يا سلام – مروان موسي (الوايلي ريمكس)

ثقافه اعاده صناعه التراكات على مزيكا جديده او “الريمكس” للأسف مش منتشهرة كتير فى المشهد المصري.. بسبب ان بيتم المقارنه كتير بين التراكين و دي بتكون مقارنة غير عادلة لان كل مُنتِج موسيقى بيكون ليه  رؤيه للتراك مختلفه وده بيخلينا نستمتع بالتراكين بشكل مختلف بكل واحد فيهم…

و من فتره مروان موسي منشن الوايلى فى استوري على انستاجرام و بعدها بساعات أعلن الوايلى عن تعاون جديد مع مروان موسي عباره عن ريميكس رسمي لتراك “ياسلام” اللى تم اصدارة على قناه مروان موسي قبل الريمكس بيوم!

و فى تراك ياسلام بياخدنا مروان موسي فى رحله مع بارات عاطفيه و ده لون مروان بيعرفه يعملة بشكل مميز جداً من زمان و وشوفناه منه في تراكات كتير زى “شهر اتنين” و “شبابيك”… بس التراك ده مختلف لان المره دى الانتاج الموسيقى من الوايلي اللى بياخدنا فى نفس الرحله مع مروان موسي بتاغم جميل بيبن قد ايه الاتنين فاهمين دماغ بعض مع كل Drop فى البيت او Beat Switch من مروان!

اخر لحظة لينا قامت قايلة “يا سلام”

رحله مروان بيتكلم فيها عن مشاعر كتير عنده و بيحكيها فى طريقه بارات صغيرة وبيحكى نهايه تجربه عاطيفيه بطريقه سرد مبهمرة مفيش كتير بيعرفوا يعملوها فى السين زي مروان موسي… و فلوهات مروان فى التراك كانت متنوعه و مناسبه جداً للبارات اللى بتتقال!

و رحله الوايلى كانت لنفس وجهه مروان وهى انهم يعملوا تراك مميز… و مزيكا الوايلى كانت بتساعد على ده فى اوقات كتير و قدرت توصل نفس المشاعر اللى بيحكى عنها مروان موسي فى باراته…

تجربه ناجحه اكيد بين الاتنين و بنتمنى انها تتكرر تانى و ثقافه “الريمكس” تنتشر أكتر فى السين!